Xabaringiz bor, kuni kecha universitetimizga “Korea Nodir Metallar va Ilg’or Materiallar Markazi (KORAM)” Ijrochi direktori, professor Kim Bum Sung tashrif buyurgan edi. Ushbu uchrashuvda bir nechta loyihalar bo‘yicha hamkorlik qilish muhokama qilingan.

Mazkur masalalarni hamkorlikda izchil davom ettirish maqsadida “University of Business and Science” delegatsiyasi Koreyaga safarida Incheon shahrida bo‘lib, KORAM rahbar xodimlari bilan uchrashdi.

Rasmiy uchrashuvda UBS va KORAM o‘rtasida muhandislik yo‘nalishlaridagi talabalarni qisqa muddatli amaliyotlarini amalga oshirish bo‘yicha muzokaralar olib borildi.

Bunda, bir o‘quv yili uchun 30–40 nafar talaba ilmiy grant asosida KORAM bazasida amaliyotlarini tashkillashtirish hamda professor-o‘qituvchilarning malakasini oshirish bo‘yicha bir qator masalalar muhokama qilindi.

Shuningdek, delegatsiyamiz KORAM bazasidagi laboratoriya va yarim sanoat sinov tekshiruvlari o‘tkaziladigan uskunalari bilan tanishdi. Ularga rahbariyat xodimlari tomonidan yuqori aniqlikda ishlovchi uskunalarni texnik xususiyatlari va jarayonlarni qay tarzda olib borilishi bo‘yicha ma’lumotlar berildi.

Yakunda, ikki tashkilot orasidagi anglashuv memorandumi 2025-yilning fevral oyida rasmiy imzolanishi kelishib olindi.